Juan Carlos Urrutxurturen heriotzak gogor kolpatu nau, eta baita nire inguruan daudenak ere. Izan ere, “bere” komunikazio agentzian egiten dut lan. Esparru horretan ezagutu nuen Juan Carlos, duela 3 urte berarekin lan egitera etorri nintzenean. Kontzeptu hori azpimarratu nahi dut, berarekin alegia, izatez nire nagusia izan arren, une oro sentitu baitut berarekin egiten nuela lan, eta ez berarentzat. Horrelakoa baita bera (baitzen esan beharko nuke, baina kostatzen zait gure albotik joan zaigula onartzea): pasioz beteriko kazetaria, edozein momentutan ekintzarako prest eta beti informatzeko gogoaz. Baliteke horrelako kazetari asko izatea, baina oso gutxi dira gai bere inguruan daudenak mugiarazteko, edozein oztoporen aurrean irtenbiderik dagoela sinistarazteko, ezinezkoak diruditenak ere aurrera atera daitezkeela erakusteko. Itzelezko energiaz egiten zuen lan, itzelezko energiaz bizi zelako, eta gai zen bera, zalantza barik, egiteko grina eta ilusio geldiezin hori inguruan geundenoi transferitzeko.
Kazetari lez maisua izan dut eta egundoko ohorea izan da niretzat, baina pertsona goraipatu nahi dut, berarenganako betirako mirespena sortu duelako niregan. Behin, gazteleraz, horrela deskribatu zidan batek Juan Carlos: “este hombre es un emocionado de la vida”. Hala zen, bai, eta horregatik hainbat eta hainbat emozionatuta gaude orain. Besarkada handi bat, Juan Carlos! Ez zaitugu ahaztuko.
Jon Rozadilla Urrutia
Kazetaria / MBN Comunicación
No hay comentarios:
Publicar un comentario